DC BARIADI AWATAKA MADIWANI KUTOWAINGILIA WATENDAJI WA KATA

MKUU wa Wilaya ya Bariadi Mkoani Simiyu Bw. Erasto Sima amewataka madiwani wilayani humo kuacha kuwaingilia watendaji wa kata na vijiji wanaotekelza majukumu yao kwa kuwakamata wazazi waliokataa kuwapeleka watoto wao shule na kuwafikisha kwenye vyombo vya sheria.

Ametoa kauli hiyo baada ya kuwepo kwa taarifa za baadhi ya madiwani kuwaingilia watendaji hao wa serikali ngazi za vijiji na kata, pindi wanapokuwa watekeleza maagizo ya serikali.

Akiongea katika baraza la madiwani wa halmashauri ya wilaya hiyo Mkuu huyo wa wilaya amebainisha kuwa hatawavumilia wanasiasa hao, wanaounga mkono wazazi wasiopeleka watoto wao shule, huku akiwataadhalisha kuwa yeyote atakayebainika atamchukulia hatua za kishrei ikiwa pamoja na kumkamata na kumweka ndani.

Ameeleza kuwa  Wilaya ya Bariadi mpaka sasa imeshindwa kufikia asilimia 70 ya watoto waliokwenda shule hasa wale wanaotakiwa kuanza kidato cha kwanza, ambapo mpaka sasa kuna asilimia 30 tu ya wanafunzi walioripoti kuanza kidato cha kwanza.

Pia amewahimiza madiwani hao wanasimamia na kuhakikisha wanatekeleza maagizo ya serikali na kufanya vikao vyote vya kisheria hasa vile vya maendeleo ya kata (WDC) vinafanyika katika muda wake na kuhudhuliwa na majumbe wake wote huku akisema kata za Sapiwi, Dutwa na Maubingi mpaka sasa zimeshindwa kufanya vikao hivyo bila ya kutoa sababu maalumu.