WAZAZI KAHAMA CHANZO CHA MIMBA ZA UTOTONI.

IMEDAIWA kuwa baadhi ya wazazi wilayani Kahama huchangia ongezeko kubwa la watoto wao kukatisha masomo kwa mimba huku wakiwa na umri mdogo hali ambayo inahatarisha  maisha yao.

Hayo yameelezwa na baadhi ya wasichana waliokatishwa masomo kwa kupata mimba wakiwa na umri wa kati ya miaka 14 hadi 19 waliokuwa wakisoma katika shule za msingi na sekondari kwenye kikao cha pamoja kati ya wazazi na watoto katika kijiji cha Nyashimbi Kata ya Mhongolo wilayani Kahama.

Katika kikao hicho kilichoratibiwa na Shirika la Kiota Women Health Development (KIWOHEDE),imedaiwa kuwa hali ngumu ya maisha ya wazazi walioko vijijni ndio chanzo cha watoto wao kujiingiza kwenye ngono wakiwa na umri mdogo.

Imebainishwa kuwa baadhi ya wazazi hupokea zawadi ndogo ndogo kutoka kwa watoto wao wa kike ikiwemo sukari,sabuni na nyama bila kuwauliza walikozitoa vitu ambayo mwisho wa siku hujikuta wakiingiza kwenye ngono isiyo salama wakiwa wadogo na hivyo kuambukizwa magonjwa ya zinaa ikiwemo Ukimwi na mimba za utotoni.

Ili kuondokana na hali hiyo Afisa Mtendaji wa Kata hiyo Bw. Emanuel Kalolo amewataka wazazi kuhoji watoto wao wanakozitoa zawadi hizo kuliko kusubiri kuhoji walikotoa mimba hali ambayo haitasaidia kwakuwa tayari watakuwa wameisha chelewa na kuwa jukumu la kuwatunza watoto hao ni la pamoja na si kuwatupia lawama walimu wa shule wanakosoma.

Naye Afisa Mradi wa Shirika la KIWOHEDE Bi. Bella Edward amesema katika kipindi cha miezi mitatu iliyopita katika mradi wa uzazi wa mpango unaotekelezwa kwenye Kata nne za Mhongolo,Busoka, Shilela na Lunguya imebainika kuwa idadi kubwa ya wasichana kati ya miaka Kumi na Kumi na Tisa wako majumbani kwa kukatishwa masomo na wazazi wao.

 MWISHO.