POLISI LAWAMANI KWA KUJIHUSISHA NA WIZI - SIMIYU

MADIWANI katika Halmashauri ya wilaya ya Bariadi mkoani simiyu wamelalamikia vitendo vinavyofanywa na baadhi ya maaskari wa jeshi la polisi wilayani humo kwa kuwapora raia mali na fedha zao pindi wanapoenda kuwakamata.

Wameyasema hayo kwenye baraza la kawaida la madiwani wa halmashauri hiyo ambapo wamesema baadhi ya maaskari wamekuwa  sio waadilifu wa kazi na kujihusisha na vitendo vya wizi na utapeli wakati wanapofanya doria usiku.

Diwani wa kata ya Girya Bw. Safari Lewa amesema kumekuwepo na taarifa mbalimbali zinazolihusu jeshi la polisi kuwa baadhi ya maaskari hasa wa usalama barabarani wamekuwa wakiwatoza fedha baadhi ya madreva pikipiki bila kuwapatia stakabadhi kwa kisingizio kuwa vitabu vimekwisha.

Almesema wakati mwingine wamekuwa wakiwafukuza madereva wa pikipiki za abiria maarufu kwa jina la bodaboda umbali mrefu hadi wakati mwingine huwasababishia ajali pamoja na kuwachapa viboko na kuwatoza fedha kubwa ambayo katika mapato ya serikali haiingizwi.

Kwa upande wake Mkuu wa wilaya ya Bariadi Bw. Erasto Sima amelitaka jeshi la polisi kupitia mkuu wa polisi wilani humo (OCD)J Bw. ulius Mjengi kuwachunguza baadhi ya askari ambao wengi wao wanatuhumiwa na kashfa mbalimbali wanazozifanya.

Mkuu huyo pia amemtaka OCD kukagua vitabu kwa askari wa usalama barabarani kuangalia mwezi huu wameingiza kiasi gani cha fedha kama faini kwa makosa mbalimbali ya vyombo vya moto kwa lengo la kutambua askari gani anafanya kazi na haandiki risiti za malipo.